ثقافة_قوم_عند_قوم_مصائب !
سناء عبدالله
صحيت الصباح كأي مواطنة سودانية لاجئة في يوغندا الجميلة والممطرة …
نضفت البيت،ورتبته،وقلت أعمل حاجة مهمة ما بيكمل الصباح بدونها ،بالذات مع الأمطار الكتيرة
البخور.. بخورنا السوداني السمح
بعد شوية… الباب دقه. عرفتها صحبتي البتبيع السمك .....
فتحت الباب بسرعة… وأنا لسه ما استحميت، ولا لميت قجة شعري، ووشي مورم من النوم… يعني حالتي الفنية في أبهى صورها . 😅
المهم …
أول ما فتحت الباب،،،، والبخور سبقني كالعادة،
لقيتها ست السمك صحبتي واقفة بالجردل بتاعها ..ابتسمت وقالت :
# مدامووو…يعني مدام،
اليوغنديين عموما بيحبوا يدلعوا الكلام 🤭
لكن فجأة… سكتت!!!!ما قالت لي كيفك !!
و شفت الخلعة في عيونها …
شوية كدة خطفت الجردل…وقالت لي
Let me come
وعملت رررررررن 🏃🏃 ...
جرت ..ايي جرت عديل 😂😂
أنا اتخلعت… وجريت وراها! قلت ليها في شنو!!!حلفت كان ترد 🙄
قلت يمكن شافت حاجة خطيرة وراي !
و انا كل شوية أعاين وراي …
ما لقيت إلا كتمة #البخور
قلت في سري معقولة شعري المنكوش ووشي المورم خوفها كده؟ ! 🤔🤔
الزولة دخلتني في حالة اكتئاب . 😔
بعد تحقيقات واستجوابات وسؤال الجيران اليوغنديبن الساكنين معاي …
اكتشفت المفاجأة !
في ثقافة كثير من #اليوغنديين …
# البخور يبيستخدموا في تحضير السحر !
يعني ببساطة …
صاحبتي ست السمك ما جرت مني الحمد لله 🤭 …
هي جرت افتكرتني بحضر في سحر،و الأكد ليها شعري المكنوش و نسختي الصباحية الفظيعة ! 😁😁😁
# العبرة
أحيانا الشيء البنشوفه عادي جدا في ثقافتنا أو عاداتنا وتقاليدنا،ممكن الآخرين يشوفوه مخيف أو غريب وكمان مرعب علي حسب ثقافتهم .
لذلك قبل ما نستغرب ردة فعل الناس ....
# نتذكر_دايما :
اختلاف الثقافات ما بيعني أن أحدنا مخطئ …
لكن بيعني فقط أننا لم نتعلم بعد كيف يرى الآخرون العالم . 🌍 .
# سودانيين_في_الغربة
# قصص_واقعية
# مواقف_مضحكة
# اقعدوا_عافية
# سناء_عبدالله
